** هو ايه شكل البلطجي الأيام دي ؟ لو انت شكلك مش وسيم بدرجة كبيرة وشعرك حاطط له (جيل) بطريقة بلدي وبنطلونك مش جينز (ماركة) وقميصك مش استايل ... ممكن تبقي اشتباه انك بلطجي ... ده علي أسس جديدة للشكل المصري زرعها فينا الاعلام ( شعر سبايكي او اشقر وعيون ملونة وليك اكونت علي الفيس بوك والتويتر ولبسك روش طحن و (ماركة) وبتاكل ( كنتاكي) ... غير كده تبقي 90% ممكن تبقي بلطجي ومش من الثوار !!!
** لماذا تم اختراع علامة التعجب (!) ؟ : حتي يمكن وضعها بعد خبر استبعاد المرشح لوزارة الاتصالات ( حازم عبد العظيم) لأنه شركته علي علاقة باسرائيل بينما انت تقوم بتصدير الغاز لاسرائيل و نتانياهو يتفاخر بأن (مبارك) كان صديقا حميما لها .
** يعني ايه شفافية ؟ : يعني تبقي مش عارف لغاية دلوقتي من بعد تنحي (مبارك) هو ليه لم يتم نقله من شرم الشيخ الي مستشفي طرة .. (ومفيش حد يقول أن مستشفي السجن مش جاهز) ... ده مصر أم الدنيا
** يعني ايه عدالة ؟ : يعني يبقي اللي قتل الثوار بيتحاكم أمام محاكم مدنية بكل ما فيها من بطء واستئناف ومعارضة للحكم ... بينما يتم محاكمة الناشطين السياسيين امام المحاكم العسكرية التي لا يوجد مجرد استئناف لاحكامها !!!
** التعريف الجديد ل (السذاجة) : أن العرب يمتلكون أكبر احتياطات البترول في العالم وما يكفي من الموارد للتحكم فيه ... ولكن لا يملكون ان يتحكموا في قراراتهم ومصائرهم وتظل مشكلة (فلسطين) بلا حل حتي اللحظة
** تعريف ( الجهل ) : أن تؤمن بأحد الأمثلة الأتية :
1) المساواة في الظلم عدل 2) من خاف.. سلم ( يا ضنايا يا بني!! )
3 ) اللي تخاف منه مايجيش أحسن منه
** ما هو تعريف الخيبة القوية ؟
الخيبة القوية أن دول اوربا تسعي الي تقوية اقتصادها وتعزيز وحدتها ... بينما نحن في مصر والعالم العربي نسعي ان نتحرر من الاحتلال الداخلي ( احتلال الحكام) لبلادنا ونحاول ان نخطو اولي خطوات الديمقراطية ونتغلب علي المعوقات ( الوطنية) ضد هذه المحاولات !!!!
** ياتري لو الثورة لم تحدث ويتم التحقيق معاه !! هل كان مبارك حيتعب بالشكل ده ويبقي عنده ارتجاف أذيني وسرطان وكل امراض العصر .. رغم انه كان في التوقيت ده حيبقي بيستعد لدخول الانتخابات للفترة السابعة ... واضح أن كرسي الحكم فيه ..الشفا !!!
** صدق أو لا تصدق : قانون ( الغدر) لمحاكمة المتهمين بالفساد السياسي لم يتم تطبيقه منذ 1952 وقت صدوره ... وده يعني حاجة واحدة بس ... أن الحياة في مصر طول السنين اللي فاتت دي : فلة شمعة منورة
وعجبي
ليست هناك تعليقات:
إرسال تعليق