ممكن لو سمحت لحظة ... ممكن تجاوب علي سؤال واحد بس .. لو تقدر

لماذا لم يتم استجواب سوزان مبارك الي الان؟ رغم كل التقارير التي تم نشرها عن ثرواتها المتضخمة ومافعلته بحسابات مكتبة الاسكندرية؟ انا بأسأل عن استجواب مش ليه لم يتم حبسها؟
2) ليه عصام شرف لم يذهب الي الامارات في رحلته الخليجية؟ ده راح السعودية والكويت وقطر ؟ في رأيك ان الامارات أقل اهمية؟ حد عارف السبب وخلي بالك ان الكلام عن الضغوط الخارجية ووقف التاشيرات للمصريين تم نفيه بشكل رسمي!!!
3)هو فين علي الدين هلال؟؟ ليه محدش طلب استجوابه ؟ وليه محدش فتح ملف (صفر المونديال الشهير ) رغم اهدار اكتر من 50 مليون جنيه علي الموضوع ده واعتباره اغلي صفر في العالم
4) فين لفافة البانجو اللي اتحشرت في زور خالد سعيد؟؟ هو ده مش حرز من الاحراز الاساسية في قضية خالد سعيد ؟؟!!!
5) ليه مفيش ولا صورة لحبيب العادلي لغاية دلوقتي؟؟ هو مفيش امين شرطة او عسكري حتي معاه موبايل بكاميرا؟؟ طيب لو فيه هم كلهم خايفين منه او متعاطفين معاه ؟؟ مفيش ولا واحد بيكرهه؟ غريبة
6)هو ليه لم يتم توجيه أي اتهامات لعمر سليمان نائب الرئيس المخلوع؟؟ ده نائب رئيس !!! معقولة هو مش مشارك في أي غلطة خلال الثورة من اللي عملوها المجرمين في النظام السابق؟؟؟!!!
7)هم الناس اللي هجموا علي السجون وخرجوا المحبوسين من حماس وحزب الله وفي اقل من يوم وصلت الناس دي بلادها ... محدش ليه طلبهم بشكل رسمي من البلاد دي؟؟ هو ده مش حق ولا كاونا محبوسين عافية؟؟ طيب هم اللي خرجوهم كانوا عارفين ان فيه ثورة؟؟!!!! وكانوا مستعدين لليوم ده ازاي بالسرعة دي
8) حد يعرف ايه اخبار قضية الاخ المصري اللي دبحوه في لبنان؟؟ ويا تري مين الجاني وانتهت علي ايه؟؟؟
9) حد يعرف مين اللي كان راكب الجمل في موقعة الجمل الشهيرة؟؟؟ ده صورته واضحة جدا وكل حاجة ظاهرة؟؟ مش محتاجة تقصي حقائق؟؟ طيب هو حد مسكه ؟ طيب خد حكم؟ طيب هو فين؟؟؟
10)هو مين اللي فجر كنيسة القديسين؟ ده كل المتهمين خرجوا وطلعوا براءة؟ هو العادلي؟ طيب انت سمعت عن تحقيق معاه بخصوص الواقعة دي؟
11) هو ليه البابا شنودة لم ينضم الي القائمة السوداء للناس اللي كانت ضد الثورة رغم انه طلب من الاقباط انهم مايخرجوش في اليوم ده !!!! واللي خرج منهم كان عصيان لاوامره في يوم الغضب وثورة 25يناير!!! 12) حد يقدر يقولي دلوقتي وبدون تفكير كام مرشح لرئاسة الجمهورية بالظبط؟ ولو مش حافظ تقدر تجمعهم؟؟
13)هي تكاليف علاج مبارك في المستشفي دلوقتي علي حساب مين؟؟ حسابه ولا حسابنا ( احنا الشعب)؟؟؟
14)هو محافظ قنا اللي تم تجميده بياخد مرتبه؟؟ طيب هو ممكن يحضر اجتماعات المحافظين ؟ طيب بعد 3 شهور تجميد حيعمل ايه؟ حيفك التلج ولا نعيد تجميده؟؟؟
15) هي فين لوحة الخشخاش؟ هي طلعت برة مصر؟ ولا لسه جوة؟؟

اصحي يا بني ....هات بطاقتك وكارنيهك

في عز الشتا ولسعة البرد وكل واحد نايم في سريره في سكن الطلبة عشان بكرة الصبح يروح محاضرته ... وفجاة دب دب علي باب الشقة وخبط بمنتهي الشدة والحماس ... اللي حظه كويس ويكون نومه خفيف حيصحي علي طول ويفتح االباب وفهم اللي فيها لكن اللي نومه تقيل ومتغطي ببطانيتين ونايم في سابع نومه يلاقي فجاه صوت عالي ويفتح عينه يلاقي عسكري شرطة ببندقية الي فوق دماغه واتنين او تلاتة في الاوضه وصوت بيقولك ... بطاقتك وكارنيهك .. طبعا شئ غير ادمي وبتحس بصدمة غريـبة وانت صاحي من النوم وفي ثانية تطلع بطاقتك ... هو في ايه؟؟... عشان هو ده النظام قبل 25 يناير ... طبعا اللي حصل ده معايا ومع ناس كتير كانت بتدرس برة مدنها ومتغربة وخاصة لو مدينة فيها جامعة كبيرة زي اسيوط مثلا.. شئ بسيط لان الحمد لله الواحد مانزلش في عز البرد وركب البوكس اشتباه ولا كان نايم ضيف مع زمايله في شقتهم اليوم ده وجات الصدفة ان الليلة تفتيش وطبعا في الحالة دي لازم تنزل تركب البوكس عشان انت مش من سكان الشقة دي وقاعد ضيف عندهم وهو ده النظام قبل 25 يناير ... كل ده بحجة الارهاب والتطرف ... طيب هو اللي ساكن برة هو اللي متطرف لكن اللي قاعد ونايم في بيته مش ممكن يتطرف ... سياسة غريبة ... وطبعا ممكن الوضع ده يتكرر معاك في اتوبيس او قطار وانت نايم ومسافر مسافات بعيدة وتلاقي واحد بيصحيك ... بطاقتك يا استاذ ... ليه ؟ عشان هو ده النظام

... قانون طوارئ متعرفش هو معمول عشان حمايتنا من الارهاب ولا حماية النظام واستمراره عشان الباشوات ياكلوا كباب ... كل ده شئ بسيط بالنسبة للتعذيب والاضطهاد اللي شافته ناس كتير .. احنا عايزين الشرطة والداخلية والنظام الجديد يعاملنا برقي واحترام لادميتنا ..... نداء الي اي ظابط شرطة.. اتقي ربنا وخاف من الله في تعاملك مع المواطن المصري .. عاملنا اننا من بلد واحدة.. احنا مش أعداء.. واتعظ مما يحدث للفرعون السابق وحاشيته ... وطرة يشيل من اللي زيهم بدل الواحد ... ألف ... نفسي أعرف ليه برة مفيش الهيبة الضخمة لظابط الشرطة اللي بنشوفها في مصر ... هل احنا غاويين تأليـه اصحاب السلطة من حولنا بمعني ان المشكلة عندنا كشعب ولا المشكلة في صاحب السلطة انه لازم يلبس بدلة التعالي والكبر ... أتمني ان كل شئ يتغير الي الاحسن وان نشوف مصر جديدة في كل حاجة ... مواطن جديد ... وظابط شرطة جديد ... مواطن يعرف حقوقه ويلتزم بالقانون و ظابط يحترم الانسان اللي قدامه عشان احنا كلنا مصريين زي بعض و عشان احنا بقينا بعد 25 يناير ..